உலகில் கல்வியில் சிறந்து விளங்கும் பல்கலை கழகங்களின்பட்டியல் வெளியீடு

புது டெல்லி: உலகில் கல்வியில் சிறந்து விளங்கும் பல்கலைக் கழகங்களின் பட்டியல் வெளியாகியுள்ளது.

 டைம்ஸ் ஹையர் எஜுகேசன் சார்பில் கல்வி மற்றும் ஆராய்ச்சிகளில் சிறந்து விளங்கும் பல்கலைக் கழகங்கள் குறித்து ஆய்வு மேற்கொள்ளப்பட்டது. 115 நாடுகளில் உள்ள 2000-க்கும் மேற்பட்ட கல்வி நிறுவனங்களில் எடுக்கப்பட்ட ஆய்வுகளின் அடிப்படையில், 9-வது ஆண்டாக இங்கிலாந்தைச் சேர்ந்த ஆக்ஸ்போர்டு பல்கலைக் கழகம் முதலிடம் பிடித்துள்ளது. 

கடந்த ஆண்டு 2-வது இடத்தில் இருந்த ஸ்டேன்போர்டு பல்கலைக் கழகம் 6-வது இடத்திற்கு தள்ளப்பட்டுள்ளது. அமெரிக்காவைச் சேர்ந்த எம்.ஐ.டி., எனப்படும் மாசாசூசெட்ஸ் இன்ஸ்டிடியூட் ஆப் டெக்னாலஜி, இந்த ஆண்டு 2-வது இடத்தை பிடித்துள்ளது.  

அதே போல, கடந்த முறை 4-ம் இடத்தில் இருந்த ஹார்வார்டு பல்கலைக் கழகம், 3-வது இடத்திற்கு முன்னேறியுள்ளது. பிரின்ஸ்டன் பல்கலைக் கழகம் 4-வது இடத்தைப் பிடித்துள்ளது. இந்தப் பட்டியலில்  இந்திய பல்கலைக் கழகங்கள் எதுவும் இல்லை. இந்தியாவின் பெங்களூரூவில் செயல்பட்டு வரும் இண்டியன் இன்ஸ்டிடியூட் ஆப் சயின்ஸ் 261-வது இடத்தில் உள்ளது.

டாப் 10 பல்கலைக் கழகங்களின் பட்டியலில், ஆக்ஸ்போர்டு பல்கலைக் கழகம், மாசாசூசெட்ஸ் இன்ஸ்டிடியூட் ஆப் டெக்னாலஜி, ஹார்வார்டு பல்கலைக் கழகம், பிரின்ஸ்டன் பல்கலைக் கழகம்,  கேம்ப்ரிட்ஜ் பல்கலை கழகம், ஸ்டேன்போர்டு பல்கலைக் கழகம், கலிபோர்னியா இன்ஸ்டிடியூட் ஆப் டெக்னாலஜி, கலிபோர்னியா பல்கலைக் கழகம், பெர்க்லே இம்பீரியல் காலேஜ் லண்டன், யேல் பல்கலைக் கழகம் ஆகியவை இடம்பெற்றுள்ளன.